मेरो यथार्थ मान कति ?

म त शून्य हजुर

शून्य प्रायः शून्य नै हुन्छु
गुणा गरेपनि, भाग गरेपनि,
आखिर शून्य, शून्य नै हुन्छु

मेरो मूल्य आफैसँग इमान्दार भै सोधें
मेरो मानको पहिचानमा अनेक उपाय रोजें
उपलब्ध सबै विधि पनि अपनाएँ
आखिर म त शून्य थिएँ, शून्यता नै पाएँ
त्यसैले त पीडाबोधमा आफ्नै मूल्य गुन्छु
यथार्थको धरातलमा अस्तित्वविहीन हुन्छु

मैले आफूलाई कसैसँग जोडी हेरें,
मैले आफूबाट कसैलाई घटाई हेरें
जोड्दा उसकै अस्तित्वमा लुक्न पुगें
घट्दा त झन आफै नै गुम्न पुगें
शून्यको त वास्तविक मान छैन भन्ने सुन्छु
हर–हिसाबले आखिर म त शून्यतामै हुन्छु

हे मलाई आश्रय दिएर प्रयोग गर्ने मानव समुदाय
अब म हात उठाएर सोध्दैछु– ‘मेरो मूल्य कति ?’
आखिर मेरो परिभाषित मान कति ?

कृपया मुल्याङ्कन गरी पाऊँ


योगी सर्वत्रापमानित ‘स्मृतिरोगी’

स्मृतिशैयाबाट

स्मृतिकुटी, स्मृतिबस्ती

#smritisangraha #smritibasti #smritikuti #smritishaiya